பிரிட்டனில், வாடிக்கையாளர்களுக்கு பணத்தை திரும்ப தருவதாக மொபைல் போன் நிறுவனம் பெரியளவில் பண மோசடிசெய்தது தொடர்பாக, கிழக்கு மிட்லாண்ட் நகரில் வசிக்கும் ஆசியாவை சேர்ந்த இரண்டு தொழிலதிபர்களுக்கு தண்டனை வழங்கப்பட்டுள்ளது.

பிரிட்டனின் லீசெஸ்டர் நகரைச் சேர்ந்த மூன்று மொபைல் போன் நிறுவனங்கள், தங்கள் வாடிக்கையாளர்களுக்கு,"மொபைல் போன் ஏர்டைம் ஒப்பந்தத்தில்' கையெழுத்திட்டதும், அவர்கள் இலவசமாக பேச ஒதுக்கப்பட்ட குறிப்பிட்ட நேரத்திற்கான பணத்தை திருப்பி தருவதாக வாக்குறுதி அளித்து, ஏராள மான பணத்தை மோசடி செய்தன.

இது தொடர்பாக, இரண்டு நிறுவனத்தின் இயக்குனர்களான, ஆசியாவை சேர்ந்த தொழிலதிபர்களான அல்டாப் மாஸ்டர் என்பவருக்கு 18 மாதங்கள் சிறை தண்டனையும்,இம்ரான் பட்டேல் என்ப வருக்கு 51 வாரங்கள் சிறை தண்டனை விதிக்கப்பட்டுள்ளது.

இதில்,பட்டேல் ஆறு மாதங்கள் வீட்டை விட்டு வெளியேறக் கூடாது என்றும், அவர் 200 மணி நேரம், சம்பளம் இன்றி பணியாற்ற வேண்டும் என்றும், லீசெஸ்டர் கோர்ட் உத்தரவிட்டுள்ளது.கடந்த 2007ம் ஆண்டு ஏராளமான வாடிக்கையாளர்கள் தங்கள் பணம் திருப்பித் தரப்படாமல் மோசடி செய்தது குறித்து போலீசில் புகார் செய்தனர்.

இதைத் தொடர்ந்து, போலீசார் நடத்திய விசாரணையில், பெரியளவிலான தொகை, மூன்று கம்பெனிகளுக்கு இடையே பரிமாற்றம் நடந்துள்ளது தெரியவந்தது. கடந்த 2008ம் ஆண்டு, ஒரே பரிவர்த்தனையில், 1.74 கோடி ரூபாய் அளவிலான பணம் பிரிட்டனில் இருந்து சீனாவிற்கு மாற்றம் செய்யப்பட்டுள்ளதும் தெரியவந்தது. இதுவரை, வாடிக்கையாளர்களிடம் இருந்து இது தொடர்பாக 300 புகார்கள் வரை வந்துள்ளன.