மைக்கேல் ஜாக்சனுக்கு பலஆயிரம் கோடி மதிப்புள்ள சொத்து உள்ளது. அந்த சொத்தில் இருந்து தனக்கு உதவித் தொகை வழங்க வேண்டும் என மைக்கேல் ஜாக்சனின் தந்தை ஜோ ஜாக்சன் (81) கோரிக்கை விடுத்துள்ளார்.

இதுகுறித்து அவர் அமெரிக்காவில் உள்ள லாஸ் ஏஞ்சல்ஸ் சுப்பீரியர் கோர்ட்டில் வழக்கு தொடர்ந்துள்ளார்.

அதில் தனக்கு மாத வருமானம் ரூ.76,500 (1,700 டாலர்) என்றும், மாதந்தோறும் ரூ.9 லட்சம் செலவு ஆகிறது என்றும் தெரிவித்து இருந்தார். தனது மனைவி மற்றும் பேரக்குழந்தைகளுக்காக அந்த பணத்தை செலவிட்டு வருவதாக கூறியிருந்தார்.

எனவே, மைக்கேல் ஜாக்சன் சொத்தில் இருந்து தனக்கு மாதந்தோறும் ரூ.6 லட்சத்து 75 ஆயிரம் (15 ஆயிரம் டாலர்) உதவித்தொகை வழங்க வேண்டும் என்று தெரிவித்துள்ளார்.

அதற்கு மைக்கேல் ஜாக்சனின் எஸ்டேட் வக்கீல் மறுப்பு தெரிவித்துள்ளார். மைக்கேல் ஜாக்சன் உயிருடன் இருந்தவரை அவரது தந்தை ஜோ ஜாக்சன் அவரை சார்ந்து வாழவில்லை. மைக்கேல் ஜாக்சனுடன் சண்டையிட்டு பேச்சுவார்த்தை இல்லாமல்தான் இருந்தார்.

இளமைப்பருவத்தில் மைக்கேல் ஜாக்சனை மிகவும் கொடுமைப்படுத்தியுள்ளார். ஏற்கனவே மைக்கேல் ஜாக்சன்தான் உயிருடன் இருந்தபோதே தனது தாய் மற்றும் தனது 3 குழந்தைகளுக்கு சொத்தில் இருந்து பணம் ஒதுக்கியுள்ளார்.

எனவே மைக்கேல் ஜாக்சனின் சொத்தில் இருந்து அவரது தந்தை ஜோ ஜாக்சனுக்கு உதவித்தொகை வழங்கக் கூடாது என கோர்ட்டில் பதில் மனு தாக்கல் செய்தார்.

இதைத்தொடர்ந்து வழக்கு விசாரணையை வருகிற 28-ந்தேதிக்கு நீதிபதி மித்சேல் பெக்லாப் தள்ளிவைத்து உத்தரவிட்டார்.